ríkisábyrgð á lántöku Tryggingarsjóðs innstæðueigenda og fjárfesta.

Virðulegur forseti. Það er alveg rétt hjá hv. þm. Unni Brá Konráðsdóttur að ný vinnubrögð hafa verið tekin upp og ég vil taka undir það sem hún sagði að á þingi er mjög margt nýrra þingmanna. Sumir þeirra hafa eindregið lagt til að þessum nýju vinnubrögðum verði beitt en ég hef jafnframt tekið eftir því að fjölmargir fóru beinustu leið á fyrsta degi ofan í flokkspólitísku hjólförin sem hafa alltaf verið viðhöfð hér. Ég upplifði það sjálfur að horfa á fólk koma inn með skærlogandi kerti og glampa í augum sem slokknaði á fyrsta degi. Það var svolítið sorglegt að horfa á það en ég horfði beinlínis á það.

Það er okkar þingmanna að breyta þessum vinnubrögðum og við getum það ef við einbeitum okkur að því og tökum einfaldlega sénsinn á því að við stefnum sennilega flestöll að einhvers konar sameiginlegu markmiði bara eftir mismunandi leiðum. Það er oftar en ekki frekar lítið því til fyrirstöðu að fólk geti ferðast saman á þeirri leið.