ríkisábyrgð á lántöku Tryggingarsjóðs innstæðueigenda og fjárfesta.

Virðulegi forseti. Ég vil taka undir þær spurningar sem lagðar hafa verið fram til virðulegs forseta um það hvenær þingfundi ljúki. Það er auðvitað orðinn algjör ósómi að vinnubrögðum hér í þinginu þegar kemur að vinnutíma. Ég vil benda virðulegum forseta á það að alla síðustu viku voru hér kvöldfundir, alla þá þingfundadaga sem þá voru fram á kvöld, og svo hefur einnig verið í þessari viku, þannig að þetta er orðin regla, ekki undantekning.

Ég vil einnig hvetja hæstv. viðskiptaráðherra til að taka þátt í umræðunni. Mér vitanlega hefur hann ekki tjáð sig í 2. umræðu málsins fram til þessa. Í málinu hafa komið fram margar nýjar upplýsingar og gögn sem væri áhugavert að fá sjónarmið hans á, ekki síst vegna sérfræðiþekkingar hans á þessum málum. Ég vil sérstaklega taka til eitt sem mig langar til að ræða af (Forseti hringir.) þessu tilefni og það er hvað það þýddi ef ákvæðum í lögum um innstæðutryggingarsjóðinn væri fylgt (Forseti hringir.) um að Íslendingar greiði þessar upphæðir í íslenskum krónum en ekki í erlendum gjaldmiðli.