ríkisábyrgð á lántöku Tryggingarsjóðs innstæðueigenda og fjárfesta.
Virðulegur forseti. Þessi orð sem hv. þingmaður viðhafði hér eru sannarlega þau orð sem ég vildi ekki viðhafa. Þetta voru einmitt þau orð sem ég hafði í huga. Af því að þingmaðurinn bað um að Rauði þráðurinn yrði rifjaður upp geri ég það hér. Í gær var sendur út á póstlista Samfylkingarinnar pistill undir nafninu „Icesave eða ísöld“ þar sem ráðþrota og röklaus Samfylking reynir að þjappa liðinu sínu í takt og þá gerir hún það með því að grípa til ósanninda og sögufölsunar, með leyfi forseta:
„Sjálfstæðisflokkurinn og Framsókn framkölluðu hrun íslensks efnahagskerfis, rauð ljós blikkuðu á íslenska fjármálastarfsemi og að lokum var Ísland fryst. Búið er að eyða ómældum kröftum í að breyta þessu og er Icesave lykillinn að viðreisn.“
Ég spyr, eins og ég spurði hér í gær: Hvar var Samfylkingin á þessum tíma? Hver fór með bankamálin? Hver hafði yfirumsjón með Fjármálaeftirlitinu? Og hver var utanríkisráðherra á þessum tíma? (Forseti hringir.) Sjálfstæðisflokkurinn hefur ekki hlaupið frá sinni ábyrgð, en Samfylkingin, (Forseti hringir.) eins röklaus og hún er, gerir það. [Kliður þingsal.]