sóknaráætlun til eflingar atvinnulífi og samfélagi um land allt.
Virðulegi forseti. Hér liggur fyrir tillaga til þingsályktunar um sóknaráætlun til eflingar atvinnulífi og samfélagi um land allt og er hluti af 20/20 sóknaráætlun svokallaðri, ef ég skil þetta bix rétt. Mig langar að spyrja hæstv. forsætisráðherra að því hver sé fyrirmyndin að þessari vinnu. Hver sé fyrirmyndin að þessari sóknaráætlun, 20/20 áætluninni. Mig langar að spyrja hæstv. ráðherra hvort það geti verið að fyrirmyndin sé það plagg sem ég held hér á sem heitir Europe 20/20. Ég er að velta fyrir mér hvort sú vinna sem hér er í gangi á vegum ríkisstjórnarinnar, þar sem farið er um allt land og er túlkað og sett upp sem einhvers konar framtíðarsýn, eða hvað á að kalla það, hvort sú framtíðarsýn sé hluti af undirbúningnum fyrir aðildarviðræður og mögulega inngöngu landsins í Evrópusambandið.
Ef við skoðum Europe 20/20 og það sem þar er að baki þá er þetta mjög keimlíkt því sem þar er verið að vinna að. Því langar mig að spyrja hæstv. ráðherra hvort þetta sé fyrirmyndin.
