139. löggjafarþing — 29. fundur,  16. nóv. 2010.

sjúkratryggingar.

191. mál
[21:03]
Horfa

heilbrigðisráðherra (Guðbjartur Hannesson) (Sf):

Virðulegi forseti. Ég mæli fyrir frumvarpi til laga um breytingu á lögum um sjúkratryggingar. Í frumvarpinu er lagt til að gildistökuákvæði, um það að Sjúkratryggingar Íslands annist gerð samninga við heilbrigðisstofnanir í eigu ríkisins og við sveitarfélög og aðra sem reka hjúkrunarheimili, verði frestað um þrjú ár, eða til 1. janúar 2014.

Samkvæmt IV. kafla laga nr. 112/2008, um sjúkratryggingar, sem tóku gildi 1. október 2008, skulu Sjúkratryggingar Íslands annast samningsgerð um heilbrigðisþjónustu, þar á meðal samninga við heilbrigðisstofnanir, sveitarfélög, sjálfseignarstofnanir, fyrirtæki og einstaklinga. Samningagerðin var áður á hendi samninganefndar heilbrigðisráðherra og heilbrigðisráðuneytisins en að því er varðar samningagerð við heilbrigðisstofnanir var um nýmæli að ræða. Samkvæmt gildistökuákvæði í 56. gr. laganna skyldi stofnunin taka við samningsgerðinni í áföngum.

Sá hluti samningagerðar sem samninganefnd ráðherra annaðist fluttist til stofnunarinnar við gildistöku laganna 1. október 2008. Hluti samningagerðar, sem var á hendi ráðuneytisins, fluttist til stofnunarinnar 1. júlí 2009. Loks var gert ráð fyrir að Sjúkratryggingar Íslands tækju eigi síðar en 1. janúar 2010 við samningsgerð við heilbrigðisstofnanir í eigu ríkisins og við sveitarfélög og aðra sem reka hjúkrunarheimili. Var því síðasttalda frestað um eitt ár eða til 1. janúar 2011, með lögum nr. 121/2009.

Heilbrigðisráðuneytið hefur gert fjölda þjónustusamninga um heilbrigðisþjónustu við ýmsa aðila, svo sem líknarfélög, sjálfseignarstofnanir og einkaaðila og hefur flutningur þeirra til Sjúkratrygginga Íslands tekið mun meiri tíma en ætlað var. Enn fremur krefst samningagerð við heilbrigðisstofnanir mikils undirbúnings sem ekki hefur komist á skrið enda hefur stofnunin vegna efnahagshrunsins ekki fengið þær fjárveitingar sem nauðsynlegar eru til að hún geti sinnt að fullu því hlutverki sem henni var ætlað samkvæmt IV. kafla laga um sjúkratryggingar. Því er lagt til að gildistökuákvæði um að gerð samninga við heilbrigðisstofnanir í eigu ríkisins og við sveitarfélög og aðra sem reka hjúkrunarheimili flytjist til Sjúkratryggingastofnunar, að þessum kafla verði frestað um þrjú ár eða til 1. janúar 2014. Af því leiðir að framlengja þarf heimildarákvæði til bráðabirgða IV til ákvörðunar á daggjöldum vegna hjúkrunarrýma með reglugerð.

Fyrirhugað er á tímabilinu að taka lög um sjúkratryggingar til endurskoðunar með hliðsjón af þeim miklu breytingum sem orðið hafa frá því að lögin tóku gildi. Í mati fjármálaskrifstofu fjármálaráðuneytisins á kostnaðaráhrifum frumvarpsins kemur fram að verði frumvarpið óbreytt að lögum verði ekki séð að það muni hafa í för með sér aukin útgjöld fyrir ríkissjóð.

Hæstv. forseti. Eins og fram hefur komið er frestun lokaáfanga á flutningi samningsgerðar til Sjúkratrygginga Íslands eina breytingin sem felst í frumvarpinu. Ég hef nú gert grein fyrir ástæðum frestunarinnar. Ég legg áherslu á það sem hér er lagt til, að ákvæði sem annars tekur gildi 1. janúar 2011 verði frestað um þrjú ár, það ákvæði er nauðsynlegt þannig að frumvarpið verði að lögum nú á haustþinginu af því að, eins og ég segi, gildistakan var 1. janúar 2011.

Leyfi ég mér því, virðulegi forseti, að leggja til að frumvarpinu verði vísað til hv. heilbrigðisnefndar og til 2. umr.