Stjórnarráð Íslands.
Virðulegur forseti. Ég mæli fyrir nefndaráliti frá allsherjarnefnd um frumvarp til laga um breytingar á ýmsum lögum vegna sameiningar ráðuneyta.
Nefndin hefur fjallað um málið og fengið á sinn fund Pál Þórhallsson og Unni Kristínu Sveinbjarnardóttur frá forsætisráðuneyti.
Með frumvarpinu eru lagðar til breytingar á heitum ráðherra og ráðuneyta í ýmsum lögum til samræmis við lög sem við samþykktum í sumar, um breytingar á lögum um Stjórnarráð Íslands, en þau mæltu fyrir um stofnun innanríkisráðuneytis á grunni dómsmála- og mannréttindaráðuneytis og samgöngu- og sveitarstjórnarráðuneytis, og stofnun velferðarráðuneytis á grunni félags- og tryggingamálaráðuneytis og heilbrigðisráðuneytis.
Nefndin hefur fjallað um frumvarpið sem felur ekki í sér efnislegar breytingar eða tilfærslu verkefna milli ráðuneyta. Innanríkisráðuneytið fær öll verkefni dómsmála- og mannréttindaráðuneytis og samgöngu- og sveitarstjórnarráðuneytis og velferðarráðuneytið fær öll verkefni félags- og tryggingamálaráðuneytis og heilbrigðisráðuneytis.
Nefndin leggur til að frumvarpið verði samþykkt.
Hv. þm. Vigdís Hauksdóttir var fjarverandi við afgreiðslu málsins. Hv. þm. Þór Saari, áheyrnarfulltrúi í allsherjarnefnd, er samþykkur því áliti sem hér er lagt fram.