fjarskipti.
Virðulegi forseti. Ástæða þess að þetta frumvarp er lagt fram er sú að við endurúthlutun á tíðniréttindum skal taka gjald. Efni þessa frumvarps á rætur að rekja til meðferðar samgöngunefndar á frumvarpi sem lagt var fram á yfirstandandi þingi, það er 136. mál og fjallar um breytingar á lögum um fjarskipti, með síðari breytingum. Því frumvarpi var vísað til samgöngunefndar þann 9. nóvember. Skömmu eftir vísun frumvarpsins til nefndarinnar var það sent hópi aðila til umsagnar. Þegar umsagnarfresti lauk 6. desember kom í ljós að umsagnaraðilar gerðu verulegar lagatæknilegar athugasemdir við efni þess. Tók meiri hluti nefndarinnar í framhaldinu þá ákvörðun að fjalla um frumvarpið á ítarlegri hátt en áætlanir gerðu ráð fyrir en fyrirsjáanlegt er að nefndin mun ekki fjalla um málið fyrr en í ársbyrjun 2011.
Virðulegi forseti. Við í þingflokki sjálfstæðismanna höfum sagt að við munum ekki standa í vegi fyrir því að lögð séu fram frumvörp til tekjuöflunar fyrir ríkissjóð. Þó svo að þetta mál hafi komið eftir 1. desember verð ég að segja að ég er sáttur við þá ákvörðun meiri hluta hv. samgöngunefndar að fara frekar þá vegferð að afla þannig heimilda til gjaldtöku en að keyra hitt málið fram með þeim hætti sem til stóð að gera.
Ég vil líka vekja athygli á því að ekki hefur verið gjaldtökuheimild í fjarskiptalögunum síðan 2003. Á þeim tíma hefur einungis einu fyrirtæki verið úthlutað tíðniheimildum. Það er gert til mjög langs tíma, til um 10 ára í senn, en menn hafa ekki áhyggjur af því að það raski samkeppnisstöðu. Ég vek hins vegar athygli á því að á árinu 2009 var einu fyrirtæki, Nova, úthlutað tíðniheimildum til 11 og 13 ára. Voru gerðar athugasemdir við að það því að það gæti hugsanlega skekkt samkeppnisstöðuna. En meiri hlutinn færir ákveðin rök fyrir því í nefndaráliti sínu að þau fyrirtæki sem gera alvarlegastar athugasemdir við það hafa notið svipaðra réttinda áður.
Ég vil í lok máls míns vekja athygli á því að verið er að hækka gjaldið frá árinu 2000 úr 16,6 millj. kr. upp í 30 millj. kr. og það eru verðlagsbreytingar. Ég nefni það, virðulegi forseti, vegna þess að það er mikil hætta á því að fyrirtækin muni velta þeim kostnaði yfir á neytendur. Í lokin fagna ég því að meiri hluti hv. samgöngunefndar hafi tekið þá ákvörðun að fara þessa leið til að afla heimildar til gjaldtöku frekar en að keyra það frumvarp í gegn sem lá fyrir þinginu í upphafi, sem að mínu mati þarf miklu meiri umfjöllunar og skoðunar við í hv. samgöngunefnd.
