samningar um ábyrgð á endurgreiðslu Tryggingarsjóðs innstæðueigenda til breska og hollenska ríkisins.

Forseti. Ég þakka hv. þingmanni fyrirspurnina. Ég verð að játa það fyrir hv. þingmanni að það er gríðarlegur veikleiki við allt þetta mál í raun hvernig stjórnarstefnan birtist okkur Íslendingum, það er mín skoðun, ég dreg enga dul á hana. Ég er í grunninn rasandi yfir þeim áherslum sem uppi eru í stjórnarsamstarfinu eða áhersluleysi hjá núverandi stjórnarmeirihluta væri raunar réttara að kalla það, sérstaklega í því sem lýtur að atvinnumálum. Allur bati í því styrkir stöðu okkar til að takast á við það sem kann að leiða af samkomulaginu sem hér liggur fyrir.

Af því að hv. þingmaður nefndi að þetta væri gríðarlegur umsnúningur hjá Sjálfstæðisflokknum í afstöðu hans vil ég enn og aftur mótmæla því. Við höfum alla tíð, eins og ég nefndi í ræðu minni, talað fyrir pólitískri lausn á málinu. Framsóknarflokkurinn kom að því og þar var líka stefnubreyting hjá Framsóknarflokknum í janúar 2010 þegar formenn Sjálfstæðisflokksins og Framsóknarflokksins fóru til Haag í boði hæstv. fjármálaráðherra til viðræðna við Breta og Hollendinga.

Eðlilega taka mál einhverjum breytingum í vinnslu þeirra en ég lít svo á að með þeim fundahöldum og þeirri vinnu sem þarna var sett í gang ætluðu menn sér að reyna að vinna saman að því að leiða málið til lykta á pólitískum grunni. Viðsnúningurinn er því ekki endilega hjá Sjálfstæðisflokknum, án þess að ég ætli að fara í meting um það. Ég er bara að benda á að allir stjórnmálaflokkar á Alþingi eiga aðild að þessu samkomulagi.