samningar um ábyrgð á endurgreiðslu Tryggingarsjóðs innstæðueigenda til breska og hollenska ríkisins.
Frú forseti. Ég þakka hv. þm. Guðlaugi Þór Þórðarsyni fyrir góða ræðu þar sem hann fór dálítið vítt yfir sviðið er snertir framtíðarfyrirkomulag þessara innstæðutrygginga og á hvaða tímamótum við erum.
Við höfum mikið gagnrýnt hraðann á þessari málsmeðferð. Hv. þingmaður rakti það ágætlega áðan að hann hefði mætt á fund fjárlaganefndar í gær til að fara yfir þessi mál og sjónarmið sín og síðan hefði málið verið rifið út úr nefndinni í gærkvöldi. Ég vil spyrja hv. þingmann hvort hann sé sáttur við þetta vinnulag? Mér heyrðist á ræðu hans að hann sé mjög ósáttur við það og ég virði sjónarmið hans. En ég hefði gjarnan viljað sjá fleiri félaga hv. þingmanns í þingflokki Sjálfstæðisflokksins taka jafnskörulega á málunum og hann gerði hér áðan, svo að ég sé ærlegur í því.
Mig langar í öðru lagi að spyrja hv. þingmann hvort honum finnist það forsvaranlegt að efnahagslega áhættan verði öll á hendi okkar Íslendinga. Ef allt fer á versta veg, sem getur gerst eins og hv. þingmaður fór yfir, tökum við alla efnahagslega áhættu en Bretar og Hollendingar verða stikkfrí.
Í þriðja lagi fagna ég því að hv. þingmaður hóf mál sitt á að ræða um að hann væri, eins og ég skildi það, hlynntur því að þetta mál færi í þjóðaratkvæðagreiðslu. Þaðan fengum við málið frá þjóðinni þar sem 98% þeirra sem tóku afstöðu til fyrri samninga sögðu nei. Ég tel að það fólk sem hefur þó komið málinu í þann búning sem það er núna eigi rétt á að segja sína skoðun og taka þannig endanlega ábyrgð á því hvaða ákvörðun verður tekin í þessu stóra máli. Það hefur sýnt sig að Alþingi hefur brugðist í þessu stóra prófi. Ég tel að stór hluti þeirra sem eru í þingsalnum sé ekki í takt við þjóðina fyrir utan.