framkvæmd þjónustusamnings við Menntaskólann Hraðbraut.
Virðulegi forseti. Ég þakka hv. þm. Pétri H. Blöndal fyrir niðurstöður hans. Ég vil draga fram tölfræði varðandi brottfallið þó að nefndin sjálf hafi ekki aflað þeirra upplýsinga. Fram kemur í gögnum sem menntamálaráðuneytið lét vinna og ég nefndi í máli mínu að brottfallið fyrir námsárin 2009 og 2010 hafi verið 5,6% sem er mun minna en annarra framhaldsskóla í landinu. Það er rétt og skylt að það komi fram. Ekki hafa fengist upplýsingar um brottfall síðustu ára, segir einnig í þeirri skýrslu.
Hvaða ályktanir við getum dregið af þessu? Það bendir til þess að þessi tilraun sé gagnleg hvað þetta varðar. Hins vegar er nemendafjöldinn auðvitað ekki stór í þessum skóla (PHB: Skiptir það máli?) og við þurfum að skoða þetta í samhengi. Það skiptir vissulega máli ef við ætlum að leggja mat á þá fjármuni sem sparast fyrir ríkissjóð á hverjum tíma.
Þetta er risastórt mál sem ég tel að menntamálanefnd og menntamálayfirvöld í landinu þurfi að skoða sérstaklega. Í Sóknaráætlun 20/20 er að finna mjög metnaðarfulla markmiðslýsingu um að ná brottfallinu niður í 10%. Ef við ætlum að ná því marki verða allir aðilar sem hér eru inni, kjörnir fulltrúar úr öllum flokkum og ráðuneyti menntamála að spýta í lófana, bretta upp ermar og koma með raunhæfa aðgerðaáætlun um hvernig við getum náð brottfalli í framhaldsskólum á par við það sem þekkist í öðrum löndum.