skipun stjórnlagaráðs.

Virðulegi forseti. Ég er alveg ósammála hv. þingmanni um það sem hann fjallaði hérna um en engu að síður flutti hann að mörgu leyti efnisríka ræðu. Hann fór hins vegar í gamalt mælskubragð sem felur það í sér að búa sér til einhvers konar óvini, koma síðan í líki riddara á hvítum hesti og ráðast á þann ímyndaða óvin. Ímyndaði óvinurinn í máli hv. þingmanns var sá að það væri Sjálfstæðisflokkurinn sem væri á móti því að endurskoða stjórnarskrána. Hv. þingmaður sagði eitthvað á þá leið áðan að þetta væri klassísk deila þeirra sem vilja og vilja ekki endurskoða stjórnarskrána. Það er algjörlega rangt, ef hv. þingmaður á við það, að Sjálfstæðisflokkurinn sé á móti því að endurskoða stjórnarskrána. Það kann að vera að okkur greini á um einhver efnisatriði, ég veit það ekki, en Sjálfstæðisflokkurinn hefur ævinlega lýst sig reiðubúinn til að taka þátt í endurskoðunar stjórnarskrárinnar. Hann hefur gert það af heilum hug. Það hefur oft leitt til niðurstöðu. Það munaði ekki mjög miklu árið 2007, þá lagðist Samfylkingin hins vegar þversum í málinu, kom í veg fyrir endurskoðun stjórnarskrárinnar.

Það sem við ræðum núna fjallar um þetta form. Það (Forseti hringir.) hefst með þessum miklu átökum, í fyrsta skipti (Forseti hringir.) átökum um formið. En ég vísa því algjörlega á bug að (Forseti hringir.) þetta sé deila (Forseti hringir.) milli þeirra sem vilja (Forseti hringir.) og hinna sem ekki vilja endurskoða stjórnarskrána.