skipun stjórnlagaráðs.

Frú forseti. Þetta er algjörlega óskiljanlegur málflutningur þegar hv. þingmaður nefnir það sem einhverja ástæðu fyrir þeirri leið sem hér er farin að ekki hafi verið oddatala við ákvörðun í Hæstarétti í þessu máli. Það skiptir nákvæmlega engu máli þegar allir dómararnir eru sammála.

Það sem hefur algjörlega skort á, ekki bara í umræðu um þetta mál og þá niðurstöðu sem varð í Hæstarétti og hvernig eigi að bregðast við henni heldur líka í allri umræðu um það stóra verkefni sem hér er undir, sem er sjálf stjórnarskráin og breytingar á henni, er að menn geri grein fyrir því hvers vegna menn treysta ekki Alþingi til að ganga í þetta verkefni. Það hefur aldrei reynt á það í þau rúm tvö ár sem liðin eru frá því kosið var, hvort tekist gæti samstaða um það á þinginu að leggja upp í þá vegferð á einhverjum sameiginlegum forsendum, heldur hefur þvert á móti öllum tímanum, kraftinum og fjármununum (Forseti hringir.) verið varið í formið. Það er dapurlegt. Og það á að halda áfram á þeirri braut.