stjórn fiskveiða.
Virðulegi forseti. Ég er alveg sammála hv. þm. Birki Jóni Jónssyni um að mikilvægt er að reyna að særa fram viðhorf stjórnarliða til málsins. Þeir hafa verið heldur fáliðaðir í þessari umræðu og ekki sagt mikið en þó hafa þeir sem hafa tekið til máls gert athugasemdir og fyrirvara við efni frumvarpsins.
Ég hef ekkert meira fyrir mér í kenningasmíð minni en það sem ég heyri hér á göngum þingsins, en ég skynja mikinn vilja hjá hv. þingmönnum Samfylkingarinnar að fá málið til nefndar áður en þeir tjá sig hér til þess að geta gert á því þær breytingar sem þeir vilja að á því séu gerðar. Þær eru eflaust ekki mjög þóknanlegar viðhorfum hæstv. sjávarútvegs- og landbúnaðarráðherra. Ég skynja það á viðhorfum hv. þingmanna Samfylkingarinnar að þeir séu þar ekkert á neinni friðarför líkri þeirri sem hv. þm. Birkir Jón Jónsson (Forseti hringir.) telur að hæstv. sjávarútvegs- og landbúnaðarráðherra sé á í þessu máli, sem ég get reyndar ekki alveg tekið undir.