stjórn fiskveiða.
Virðulegur forseti. Það er rétt sem hv. þingmaður bendir á, það eru ekki bara stjórnarandstöðuflokkarnir, Sjálfstæðisflokkur, Framsóknarflokkur og Hreyfingin, sem hafa ýmislegt við þessi mál að athuga. Þeir stjórnarliðar sem á annað borð hafa tjáð sig um þau hafa margir, líklega flestir hverjir, gert við þau verulegar athugasemdir. Auðvitað vekur það furðu þegar ríkisstjórn leggur fram frumvarp sem í fyrsta lagi er engin víðtæk sátt um, en ekki einu sinni sátt í stjórnarliðinu sjálfu. Það bætist við þann ótrúlega málatilbúnað allan sem hefur verið í kringum það hvernig þessi mál komu inn í þingið og þá getur maður ekki annað en ályktað að þessi mál og framlagning þeirra nú snúist um eitthvað allt annað en raunverulegan vilja til að gera þær breytingar á fiskveiðistjórnarkerfinu sem þar er lýst, enda hlytu menn þá að hafa byrjað á því að afla fylgis við þær breytingar innan stjórnarliðsins, ná meiri hluta í þinginu fyrir þeim.
Nei, líklega snýst þetta fyrst og fremst um pólitíska spunaleiki, að geta dreift athyglinni frá endalausum vandræðagangi ríkisstjórnarinnar á öðrum sviðum og látið umræðuna snúast dálitla stund um sjávarútvegsmálin svoleiðis að hæstv. forsætisráðherra geti haldið áfram að endurnýta frasa sína um sjávarútveg, uppnefna menn og berja sér á brjóst sem einhvers konar fulltrúa sanngirni í þessum umdeildu málum þegar augljóst er að frumvörpin sem lögð eru fram hafa ósköp lítið með sanngirni að gera.
