sameining háskóla landsins.
Virðulegi forseti. Ég þakka hæstv. ráðherra fyrir svarið en ég ítreka mikilvægi þess að tekið verði af skarið um sameiningu háskólanna og að reknar verði öflugar háskólastofnanir hér á landi.
Það er ekki gott, eins og allt stefnir í með þessu áframhaldi, að það verði fleiri háskólarektorar í landinu en leikskólastjórar. Þingið verður að taka frumkvæði í málinu. Fjárlög næsta árs eiga að taka mið af því að fé verði varið til rekstrar tveggja öflugra háskóla. Þannig verði starfræktar tvær vísindastofnanir á landinu með nokkrar starfsstöðvar sem hafa getu til að vinna að rannsóknum og bjóða upp á háskólakennslu eins og hún gerist best í heiminum.
Verkefni háskólanna sjálfra er síðan að koma sér saman um hvernig sameiningunni verði best háttað, það að á ekki að ákveða það hér í þingsal, það eiga skólarnir sjálfir að ákveða. En stefnan verður að koma héðan.
Við verðum að leggja aukna áherslu á öflugar háskólastofnanir. Það gera allar nágrannaþjóðir okkar sem vilja auka þekkingarstig, lífskjör og samkeppnishæfni. Höfum það að leiðarljósi við endurskipulagningu háskólakerfisins, (Forseti hringir.) sem ég skora á Alþingi og ráðherra að ráðast í hið fyrsta.