gjaldeyrismál og tollalög.
Frú forseti. Ég held að við séum komnir þarna að kjarna málsins, ástæðan fyrir stöðu þessara mála og þeirri staðreynd að nú á að framlengja gjaldeyrishöftin fram að áramótum 2015/2016 er sú efnahagsstefna og atvinnustefna sem núverandi ríkisstjórn hefur rekið síðustu tvö og hálft ár. Það er viðurkennt að gjaldeyrishöft stuðla að veikingu krónunnar. Hvað þýðir það á íslensku? Það þýðir að við erum að ávísa enn veikara gengi á Íslendinga á næstu árum sem þýðir að Ísland getur orðið viðvarandi láglaunaland og samkeppnishæfni og staða landsins mun skerðast eftir því. Ég tel að það sé mjög varasamt að samþykkja frumvarpið með þeim skilaboðum að við ætlum að lengja í höftunum um allt að þrjú ár. Ég tel að við þurfum að koma í veg fyrir það.
Mig langar að spyrja hv. þingmann að því hvað honum þyki um þá hugmynd að við mundum í það minnsta reyna að draga úr högginu og stytta þetta tímabil vegna þess að þetta eru mjög slæm skilaboð til þeirra sem vilja fjárfesta og binda traust sitt við íslenskt efnahagslíf. Það er ekkert voðalega spennandi að fjárfesta í landi sem er með viðvarandi gjaldeyrishöft og maður veit aldrei upp á hvaða nýjum höftum verður tekið til að koma í veg fyrir þennan leka sem er svo frægur því að fólk finnur sér leið fram hjá höftunum.
Í efnahags- og skattanefnd hefur komið fram að ákveðnar atvinnugreinar eru í vaxandi mæli með umsvif sín fyrir utan gjaldeyrishöftin og hvað þýðir það? Jú, öll verðmætasköpun sem þar á sér stað gerist fyrir utan hagkerfi okkar og við njótum þar af leiðandi ekki góðs af henni. Þetta segir okkur enn eina ferðina að við verðum að slaka á höftunum (Forseti hringir.) og áramótin 2015/2016 mega ekki verða (Forseti hringir.) ein af grunnforsendum þeirra skilaboða sem við sendum frá okkur.