Stjórnarráð Íslands.

Frú forseti. Ég vil lýsa yfir mikilli undrun að frú forseti skuli ekki svara spurningu okkar um hvenær ljúka eigi þessum fundi. Við höfum verið að reyna að bæta vinnubrögðin á Alþingi. Ef þeir þingmenn sem hér starfa geta ekki fengið svör við því hvenær áætlað er að fundinum ljúki — við þurfum öll að skipuleggja okkar tíma — er það ekki til vitnisburðar um mikla framför í störfum Alþingis.

Á hinn bóginn vil ég benda hv. þingmönnum stjórnarliðsins sérstaklega á að í þessu máli er verið að ganga þvert á þær hugmyndir sem menn hafa haldið á lofti eftir hrun um að auka vægi og styrk Alþingis og minnka þannig áhrif framkvæmdarvaldsins, sem hafa verið allt of mikil í gegnum tíðina.

Það er rétt að fresta umræðunni þannig að eldheitir stuðningsmenn þessa máls mæti í þingsal til viðræðna við okkur í stjórnarandstöðunni, vegna þess að við ræðum hér grundvallarmál sem á ekki skilið að vera rætt fram á miðjar nætur (Forseti hringir.) að fjarstöddum mörgum mjög mikilvirkum stjórnarliðum sem hafa (Forseti hringir.) af veikum mætti reynt að styðja við framgang málsins. (Gripið fram í: Heyr, heyr.)