Stjórnarráð Íslands.
Hæstv. forseti. Ég þakka hv. þm. Þorgerði Katrínu Gunnarsdóttur fyrir ágæta og málefnalega ræðu. Hún spyr mig nokkurra spurninga.
Hún spyr fyrst um blaðafréttir þess efnis að ég hafi haft fyrirvara á gagnvart þessu máli í ríkisstjórn. Svarið er játandi. Það hefur áður komið fram og sá fyrirvari stendur enn. Þetta mál hefur átt sér langan aðdraganda og það er að sannast í þessu máli eins og með ávextina að þeir verða því betri þeim mun betur sem þeir fá að þroskast. Sú gagnrýni sem ég setti fram á sínum tíma við skýrslu Gunnars Helga Kristinssonar prófessors, sem frumvarpið er unnið upp úr, er þungamiðjan í gagnrýni minni á frumvarpið, þ.e. aukin miðstýring innan Stjórnarráðsins. Ég er andvígur henni og hef gagnrýnt það.
Þetta mál hefur verið að taka breytingum og á hugsanlega enn eftir að taka breytingum en það er mjög mikilvægt að okkur takist að tryggja víðtæka sátt um skipan Stjórnarráðsins og samskipti ríkisstjórnar og Alþingis.