frestun á fundum Alþingis.

Háttvirtir alþingismenn. Þá er komið að lokum þessara septemberfunda Alþingis, og fleiri þingfundir verða ekki haldnir á 139. löggjafarþingi. Septemberfundirnir hafa verið annasamari og átakameiri en flestir áttu von á. Ég treysti því þó að alþingismenn gangi úr húsi í góðri sátt.

Samkvæmt nýjum þingsköpum mun nýtt þing frá og með næsta ári verða sett fyrri hluta septembermánaðar, annan þriðjudag í september. Þessir septemberfundir verða því þeir síðustu með þessu sniði.

Stutt er til nýs þings, 140. löggjafarþings, sem mun marka skil í starfsháttum Alþingis. Undirbúningur að framkvæmd hinna nýju þingskapa stendur nú yfir og heiti ég á þingmenn að sameinast um að tryggja árangursríka framkvæmd þeirra, ekki síst hvað varðar þá mikilvægu nýbreytni sem verður í nefndastarfi þingsins. Ég hvet þingmenn og þingflokka að leggja sig alla fram til að ná góðu samkomulagi um hvernig við skipum með okkur verkum á Alþingi framvegis

Ég vona að þingmönnum nýtist vel næstu tvær vikur til undirbúnings fyrir komandi þing.