ráðstafanir í ríkisfjármálum.
Virðulegi forseti. Ég þakka hv. þm. Lilju Mósesdóttur fyrir þessa spurningu. Það er gaman að segja frá því að Torben Andersen var leiðbeinandi minn í doktorsnámi. Við höfum skrifað saman nokkrar greinar og vorum saman með rannsóknir á jöfnuði sem birtust síðan í vísindatímaritum, þannig að ég þekki Torben og verk hans mjög vel.
Hvað varðar skattpíninguna — það eru raunverulega nokkrar spurningar sem hv. þingmaður spyr — þá kemur það fram í nýlegri skýrslu frá OECD að þegar tekið er tillit til lífeyrissjóðakerfa landa OECD er skattbyrði heimila næstmest hér á landi, innan OECD, næstmest. Það kalla ég skattpíningu.
Í öðru lagi segir hv. þingmaður frá því að rannsóknir Torbens Andersens hafi sýnt að engin tengsl væru milli skattbyrðar og atvinnuþátttöku en samt segir þingmaðurinn að það sé jú í jaðarhópum. Ég held að sú rannsókn sem við eigum mest að hugsa til sé hin merkilega rannsókn sem Gylfi Zöega prófessor gerði á skattlausa árinu sem birtist í American Economic Review og er talin vera ein merkilegasta rannsókn sem hefur verið gerð á þessu sviði. Óþarfi er að segja að American Economic Review er talið vera virðulegasta hagfræðitímarit heims. Þar kemur mjög greinilega fram að skattlausa árið, þegar skattbyrðinni var létt af fólki, (Forseti hringir.) leiddi til mikils framboðs vinnuafls. Mjög margar rannsóknir sýna það. Sú rannsókn sem Torben framkvæmdi, (Forseti hringir.) ég er ekki kunnugur henni en hún virðist ríma við þetta, en ég tala sérstaklega um jaðarhópa.
