breytingartillaga og kostnaðarmat við 6. mál.

Virðulegi forseti. Ég fagna viðbrögðum hv. þm. Péturs Blöndals við þeirri umræðu sem hér hefur farið fram síðustu mínúturnar vegna þess að hann tekur þó mark á því sem hér er lagt inn í umræðuna, gagnstætt ýmsu því sem hefur verið sagt á undan og vekur í raun og veru enga furðu vegna þess að það sannaðist í máli hv. þm. Gunnars Braga Sveinssonar sem sagði: Þetta mun ekki takast. Það mun ekki takast að búa til nýja stjórnarskrá vegna þess að hér eru þingmenn í stórum hópum sem ætla að bregða fæti fyrir það með öllum ráðum. (Gripið fram í.)

Í þeirri tillögu sem hér er verið að flytja er gengið fram með þau lykilmarkmið sem komu fram í upphaflegri tillögu Þórs Saaris og félaga um að málið færi sem fyrst á dagskrá þingsins, því yrði vísað til stjórnskipunar- og eftirlitsnefndar, haft yrði samráð við stjórnlagaráð um málið og síðan yrði það sett til þjóðaratkvæðis. Öll þessi atriði eru í þeirri tillögu sem hér er til afgreiðslu. (Gripið fram í.)

(Forseti (ÁRJ): Forseti minnir enn á hljóð í sal.)