ráðgefandi þjóðaratkvæðagreiðsla um tillögur stjórnlagaráðs að frumvarpi til stjórnarskipunarlaga.

Frú forseti. Ég þakka hv. þingmanni fyrir ræðuna, hún var reyndar í styttra lagi. Ég vil spyrja hv. þm. Skúla Helgason því að hann talaði um sérvalda fulltrúa þjóðarinnar: Telur hann sjálfan sig ekki vera sérvalinn fulltrúa þjóðarinnar?

Hann talaði mikið um þjóðina, aftur og aftur um þjóð. Hvað er eiginlega þjóð? Er það íslenskir ríkisborgarar? Er það fólk sem er með atkvæðisrétt á Íslandi? Hvað segir hann um útlendinga sem eru búnir að búa í 20 ár á Íslandi? Eru þeir hluti af íslensku þjóðinni? Hann talar svo mikið um þjóðina. Ég vil gjarnan fá að heyra nánar hvernig hann lítur á þessa þjóð sem hann þekkir svona vel.

Síðan vildi ég spyrja hann um ýmis atriði úr tillögum stjórnlagaráðs, t.d. um Lögréttu. Telur hann eðlilegt að hún sé sett upp eins og stjórnlagaráðið leggur til, að Lögrétta sé kosin af Alþingi til að fara yfir frumvörp frá Alþingi? Væri ekki miklu skynsamlegra að nýta þekkinguna í Hæstarétti og hann yrði þá Lögrétta? Telur hv. þingmaður t.d., ef maður kæmist að þeirri niðurstöðu að það væri sniðugt að fullskipaður Hæstiréttur yrði Lögrétta, að við mættum þá breyta því með þessum tillögum sem hér er um að ræða um ferlið? Má þá breyta því í þá veru sem mönnum finnst vera skynsamlegt því að það fari þvert á lög eða alþjóðasamninga eins og hér er talað um?

Svo vildi ég spyrja hann að því sem ég hef spurt að áður. Þegar menn eru búnir að segja: Ég ætla að samþykkja þessa tillögu stjórnlagaráðs um nýja stjórnarskrá — hvernig geta þeir þá verið á móti því að náttúruauðlindir séu lýstar þjóðareign þar sem það er innifalið í tillögum stjórnlagaráðs? Hvernig getur maður verið á móti því? Þetta er rökleysa. Eða sér þingmaðurinn þetta einhvern veginn öðruvísi? Hvernig sér (Forseti hringir.) hann t.d. að atkvæði kjósenda alls staðar á landinu vegi jafnþungt? Er það ekki eitt kjördæmi?