ráðgefandi þjóðaratkvæðagreiðsla um tillögur stjórnlagaráðs að frumvarpi til stjórnarskipunarlaga.

Virðulegi forseti. Við greiðum atkvæði um það hvort það mál sem hér um ræðir eigi að ganga til síðari umr. eða ekki. Ég vil byrja á að leiðrétta hv. þm. Álfheiði Ingadóttur vegna þess að það kom einmitt fram í þeim upplýsingum sem hv. þm. Magnús Orri Schram reiddi fram að svona meðferð er ekki fordæmalaus. Að minnsta kosti í tveimur tilfellum sem hann nefndi hefur þetta verið gert áður þannig að ég ætla að leiðrétta það. (Gripið fram í: Um lagafrumvarp.) [Kliður í þingsal.] (ÁI: Lagafrumvörp.)

Ég ítreka það sem fram kom hér í umræðum í gær að þetta mál er vanbúið og ófullburða. Það hefur ekki verið hlustað á sérfræðinga í stjórnskipunarrétti og það á eftir að gera ýmsar lagfæringar til að þetta mál gæti orðið að máli sem væri hægt að bera undir þjóðina í þjóðaratkvæðagreiðslu. Tíminn til þess er of knappur. Ríkisstjórnin hefur (Forseti hringir.) eina ferðina enn ekki staðið sig við að koma þeim málum sem hún þó leggur áherslu á til þingsins í tæka tíð og þess vegna (Forseti hringir.) greiði ég atkvæði gegn því að þetta mál gangi til síðari umr.