ráðgefandi þjóðaratkvæðagreiðsla um tillögur stjórnlagaráðs að frumvarpi til stjórnarskipunarlaga.
Forseti. Ég ítreka að ég hef allnokkrar áhyggjur af því hvernig málið kemur út úr nefndinni vegna þess að það er augljóst að nefndarmenn hafa mismunandi skilning á ákveðnum grundvallaratriðum varðandi frekara framhald þessa máls. Það er afleitt að mínu mati þó svo að við kunnum að hafa skiptar skoðanir á innihaldi þeirra tillagna sem liggja fyrir. En grundvallaratriðið þegar við vinnum að svona stóru og viðamiklu máli sem varðar stjórnskipan Íslands hlýtur að vera það að við höfum sameiginlegan skilning á þeim grunnhugtökum sem verið er að vinna með. Mér þykir skorta nokkuð á það.
Þess vegna vil ég spyrja hv. þm. Birgi Ármannsson að því hvernig í rauninni umræðan eða vinnan í nefndinni var í því efni að skiptast á skoðunum um þessa grundvallarþætti og hvort hann deili þeirri skoðun minni eða hvort hún sé rétt í raun að málið sé komið þannig út úr nefndinni að nefndarmenn hafi ekki sama skilning á ýmsum þáttum þessa máls sem lúta að grundvallarspurningum um meðferð þess.
