ráðgefandi þjóðaratkvæðagreiðsla um tillögur stjórnlagaráðs að frumvarpi til stjórnarskipunarlaga.

Virðulegi forseti. Þakka hv. þm. Birgi Ármannssyni fyrir yfirferð hans um málið.

Við erum sammála um að sú grundvallarvinna sem bíður þingsins á komandi hausti varðandi þetta frumvarp sem við ætlum að leggja fram í haust hlýtur að taka mið af því sem við erum að kalla eftir varðandi þjóðarvilja og afstöðu til einstakra þátta sem meðal annars er verið að leggja fram í þessum spurningavagni. Þess vegna skiptir máli að fá viðbrögð og svör við því inn í umræðuna núna og nýta það tækifæri sem liggur fyrir með væntanlegum forsetakosningum. Ég heyrði á máli þingmannsins að hann taldi þar upp kosti og galla og taldi það vega meira hverjir ókostirnir væru.

Ég spyr: Telur þingmaðurinn ekki að það skipti máli að geta nýtt sér hagræðið, ekki endilega fjárhagslega hagræðið sem liggur klárt fyrir upp á einhver hundruð milljóna, 200 milljónir, heldur hitt hagræðið að fá tryggingu fyrir því að við fáum (Forseti hringir.) mun fleiri til að taka afstöðu í slíkri kosningu en ella, m.a. með vísan til þess sem hann nefndi áðan um stjórnlagakosningar sem fóru fram fyrir tveimur, þremur árum?