ráðgefandi þjóðaratkvæðagreiðsla um tillögur stjórnlagaráðs að frumvarpi til stjórnarskipunarlaga.
Frú forseti. Hv. þingmaður notaði þýska orðið „Besserwisser“ sem þýðir maður sem þykist vita meira en hann veit. Mér finnst það harður dómur um sérfræðinga sem kallaðir eru fyrir nefndir á Alþingi að gefa þeim slík nöfn. Ég fullvissa hv. þingmann um að þetta orð hefur ekki jákvæða merkingu í þýsku máli.
Ég spurði um þessar spurningar sem öllum er svarað í stjórnarskránni. Með því að greiða atkvæði með stjórnarskránni er fólk búið að taka afstöðu til þeirra. Af hverju er verið að spyrja þeirra aftur? Af hverju er verið að spyrja í þessum nýju drögum aftur sömu spurninga og búið er að taka afstöðu til í stjórnarskránni?
Ég nefndi þrjú dæmi, um auðlindirnar, þjóðkirkjuna og persónukjörið, það er í stjórnarskránni líka, í 2. mgr. 39. gr. Það er búið að bera upp allar spurningarnar og ég spurði hv. þingmann um rökfræðina á bak við þetta.