ráðgefandi þjóðaratkvæðagreiðsla um tillögur stjórnlagaráðs að frumvarpi til stjórnarskipunarlaga.

Hæstv. forseti. Talandi um tímahrak þá er auðvitað rétt að geta þess að Alþingi og sú nefnd sem við hv. þm. Lúðvík Geirsson eigum sæti í, stjórnskipunar- og eftirlitsnefnd, fékk tillögur stjórnlagaráðs til meðferðar í byrjun október. Hálfu ári síðar er ákveðið að leggja þær óbreyttar — ég endurtek óbreyttar — í atkvæði þjóðarinnar á einhverri tiltekinni dagsetningu sem er eins og ég segi ekki náttúrulögmál heldur ákvörðun einhvers fólks.

Þegar nefndin og þar á meðal þingflokkur hv. þm. Lúðvíks Geirssonar hafði haft þetta mál í sínum höndum í sex mánuði var eins og menn rönkuðu við sér og segðu: Við erum að falla á tíma. Er það kannski það sem veldur því tímahraki sem hér er um að ræða? Ef ætlunin var allan tímann að leggja tillögurnar óbreyttar í dóm þjóðarinnar í þjóðaratkvæðagreiðslu, af hverju var ekki hafist handa við það í október?