breytt skipan ráðuneyta í Stjórnarráði Íslands.

Ég held að það sé alveg ljóst, virðulegi forseti, að ráðuneytin hafa sum hver verið allt of lítil og veikbyggð, mörg ráðuneyti og það var það sem kom fram í skýrslu rannsóknarnefndarinnar. Verið er að mæta þessum sjónarmiðum með því að gera þau faglega sterkari, styrkja þau og gera þau öflugri til að takast á við sín verkefni.

Það er gegnumgangandi í þessu og það er markmiðið með breytingunni sem við erum að fara í. Tökum sem dæmi sameiningu atvinnuvegaráðuneytanna, það er nýsköpunarþáttur í öllum ráðuneytum og stoðkerfið í nýsköpunarmálum nýtist miklu betur ef þetta er allt í einu ráðuneyti. Það sama gildir með efnahagsstjórnina. Við erum að samhæfa hana miklu betur en var þegar við bjuggum við veikt efnahags- og viðskiptaráðuneyti og dreifða efnahagsstjórn í þremur ráðuneytum. Það er því fyrst og fremst verið að byggja þessi ráðuneyti upp til að takast á við verkefni. (Forseti hringir.) Við erum líka að tala um samhæfingu í embættismannakerfinu og að gera það sterkara.