stjórnsýsluhindranir á Norðurlöndum, munnleg skýrsla ráðherra norrænna samstarfsmála.

Virðulegur forseti. Ég þakka hæstv. ráðherra fyrir svörin og hvet til þess að þessi sex mánaða biðtími verði tekinn til endurskoðunar, ég þakka hæstv. ráðherra kærlega fyrir að vekja athygli á því. Það er auðvitað grundvallaratriði að við göngum ekki fram með harðar kröfur í garð annarra ef við erum ekki tilbúin að uppfylla sömu kröfur sjálf. Í fljótu bragði verður ekki betur séð en að hagsmunir okkar séu miklu ríkulegri af því að okkar fólk þurfi ekki að sæta biðtíma í hinum norrænu löndunum en að veita strax aðgang hér fyrir þá sem hingað sækja.

Ég vildi þá í öðru lagi spyrja hæstv. ráðherra um þann hóp sem hann nefnir sem á réttindi til að mynda til örorkulífeyris í fleiri en einu Norðurlandanna. Ég vil spyrja hann um viðbrögð við þeirri beiðni Öryrkjabandalagsins að Tryggingastofnunin hér aðstoði fólk við að sækja réttindi sín á hinum norrænu löndunum og að notandinn fái bætur sínar greiddar á einum stað, þ.e. frá Tryggingastofnun, en hún sæki síðan hlut annarra tryggingastofnana á hinum Norðurlöndunum.

Sömuleiðis spyr ég hæstv. ráðherra hvort einhver umræða hafi verið um það hjá norrænu velferðarráðherrunum að samræma örorkumatið eða starfsgetumatið eftir atvikum, en það hefur mjög verið í deiglunni á öllum Norðurlöndum, hygg ég, hvernig örorka er metin og ekki að ástæðulausu.