áætlun um vernd og orkunýtingu landsvæða.
Hæstv. forseti. Ég þakka hv. þingmanni fyrir svarið og það var ágætlega upplýsandi. Mig langar þá að spyrja hv. þingmann hvort hún hafi skoðað hinar virkjanirnar sem lenda jafnframt í biðflokki við þessa þingsályktunartillögu, þ.e. Hágönguvirkjanir og Skrokköldu, þar sem hv. þingmaður hefur kynnt sér virkjunarmál mjög ítarlega.
Aðeins aftur að Þjórsárvirkjununum. Það er ljóst að þær hafa allar lent í nýtingarflokki í báðum áföngum rammaáætlunar. Þess vegna er mjög athyglisvert að eftir að allir helstu sérfræðingar okkar á þessu sviði hafa legið yfir því í mörg ár — smíðuð hefur verið aðferðafræði til að reyna að komast að niðurstöðu um það hvað er best bæði fyrir náttúruna og eins fyrir íslenska þjóð með tilliti til atvinnumöguleika, nýtingar o.s.frv. Í ljósi þess að í báðum áföngunum raðast þessir kostir í nýtingu þá er mjög sérkennilegt að ráðherrar í ríkisstjórninni geti síðan tekið þær niðurstöður og raðað þeim upp eftir sínum hentugleikum og að því er virðist aðallega með tilliti til þess hvort ríkisstjórnin lifir eða deyr.