ráðgefandi þjóðaratkvæðagreiðsla um tillögur stjórnlagaráðs að frumvarpi til stjórnarskipunarlaga.

Virðulegi forseti. Það er einmitt spurningin: Hvenær byrjar hin efnislega breytingavinna, efnisleg yfirferð yfir hverja og eina tillögu til að kalla fram sjónarmið varðandi innihald? Ég nefni til dæmis 91. gr. í tillögum stjórnlagaráðs þar sem mjög er þrengt að möguleikum stjórnarandstöðu til að leggja fram vantraust. Gert er að skilyrði að vantrausti fylgi tillaga um hver eigi að taka við. Ef við snúum þinginu aðeins við og sjáum fyrir okkur stjórnarflokkana í stjórnarandstöðu, dettur einhverjum í hug að þeir flokkar kæmu sér saman um hver ætti að taka við stjórnvelinum? Það eru álíka líkur á að það mundi gerast og að sá sem hér stendur eigi eftir að koma til tunglsins, sem eru vonandi ekki miklar líkur á.

Mig langar líka að spyrja hv. þingmann um hvort sú staðreynd að meiri hluti stjórnskipunar- og eftirlitsnefndar hefur ákveðið að fara þurfi yfir tillögur stjórnlagaráðs, gera þær í húsum hæfar, sé ekki áfellisdómur yfir vinnu stjórnlagaráðs eða skilum ráðsins, ég ætla orða það frekar þannig.

Auðvitað vitum við að margt af því ágæta fólki sem starfaði í stjórnlagaráði hefur ekki lögfræðiþekkingu eða lögfræðibakgrunn frekar en sá er hér stendur. Einhverjir aðilar ættu samt að hafa haft þekkingu til að setja málið fram með þeim hætti að ekki þyrfti að fara í einhvers konar ritskoðun eða lagfæringar á praktísku atriðunum þannig að menn gætu einhent sér í að ræða innihaldið, efnislegar breytingar.

Ég velti þessu fyrir mér, því að það virðist vera niðurstaðan, eins og ég skil þetta, að það þurfi að setja af stað einhvers konar hreinsunardeild til að fara yfir tillögur stjórnlagaráðs, til að laga þær til. Síðan á að fara með þetta í skoðanakönnun í október sem mér sýnist kosta (Forseti hringir.) álíka mikið og niðurskurðurinn er hjá nokkrum heilbrigðisstofnunum.