ráðgefandi þjóðaratkvæðagreiðsla um tillögur stjórnlagaráðs að frumvarpi til stjórnarskipunarlaga.
Virðulegi forseti. Ég þakka hv. þingmanni fyrir ræðuna. Hvað varðar efnislega umræðu um þetta mál er auðvitað mjög sérkennilegt að áður en búið er að ræða málið í heild sinni jafnlengi og hæstv. forsætisráðherra hélt eina ræðu byrjar hún að garga: Málþóf. Það skýrir dálítið það sem við erum að ræða.
Mig langar að spyrja hv. þingmann, af því að hann sat …
(Forseti (ÁI): Forseti vill biðja hv. þingmann að nota hefðbundin ávarpsorð og gæta orða sinna í ræðustól á Alþingi.)
Ég mun gera það, virðulegi forseti.
Mig langar að spyrja hv. þingmann — þar sem hann sat í nefndinni þegar ákveðið var að halda áfram eftir að kosningarnar voru dæmdar ógildar og stjórnlagaþingi breytt í stjórnlagaráð, án þess að ég ætli að vera með einhverjar fabúleringar um það — út í það þegar tillögur stjórnlagaráðs komu til þingsins: Hver er skoðun hans á því nú þegar búið er að fara í þessa vinnu á vegum stjórnlagaráðs, búið að halda þjóðfundinn? Var það í raun ekki nægjanlegt veganesti fyrir þingið að halda áfram með vinnuna á þeim grunni?
Ég tek undir það með hv. þingmanni að það er mjög óljóst hvað varðar þessa skoðanakönnun, sem á að fara fram, hvert hún færir okkur í meðferð málsins. Ég vil spyrja hv. þingmann hvort ekki væri eðlilegra að þingið tæki tillögur stjórnlagaráðs, færi yfir þær og byggði á þeim þær tillögur sem þingið ætti að samþykkja og legði þær síðan fyrir þjóðina. Þetta milliskref, að fara í skoðanakönnun sem er munaðarlaus að því er mér finnst — hefði ekki verið nægilegt að hafa skýrslu stjórnlagaráðs og fara þá beint í vinnuna á vegum þingsins í stað þess að fara í svona skoðanakönnun (Forseti hringir.) sem mér finnst ekki skipta neinu máli?