ráðgefandi þjóðaratkvæðagreiðsla um tillögur stjórnlagaráðs að frumvarpi til stjórnarskipunarlaga.
Hæstv. forseti. Hér liggur fyrir þetta ágæta minnisblað sem ég vona nú að hv. þingmenn kynni sér og horfi til sem leiðar frekar en þeirrar tillögu sem liggur fyrir frá stjórnskipunar- og eftirlitsnefnd um meðferð þessa máls.
Við höfum tillögur stjórnlagaráðs í höndunum og hver sem er á þingi getur lagt það fram sem heild sem frumvarp að nýrri stjórnarskrá, það þarf ekki þjóðaratkvæðagreiðslu til að málið fari í þann farveg. Það hefur reyndar aldrei þurft þann farveg til. Allt frá því að stjórnlagaráðið skilaði af sér á síðasta sumri hefur hverjum þingmanni verið í lófa lagið að leggja slíkt plagg fram sem frumvarp að nýrri stjórnarskrá, sem fengi þá eðlilega meðferð í þinginu. Það hefur enginn hindrað menn í því, það hafa allir verið frjálsir að því. Þeir sem telja tillögur stjórnlagaráðs góðar hefðu getað gert þær að sínum tillögum og komið þeim á framfæri með þeim hætti.
Af einhverjum ástæðum var ekki farið í það heldur eru farnar einhverjar krókaleiðir í þessu sambandi og eins og hv. þingmaður nefndi í ræðu sinni er frekar verð að lengja í málsmeðferðinni og gera hana flóknari og erfiðari. Þeir sem segjast í orði kveðnu vera hrifnastir af tillögum stjórnlagaráðs eru sjálfir bara að seinka því að málið komist inn í þingið. Hver einasti þingmaður, þingmenn Hreyfingarinnar eða hv. þingmenn annarra flokka, hver sem er, hefði getað komið með tillögur stjórnlagaráðs í september, október á síðasta ári og sagt: Ég legg þetta fram sem frumvarp til nýrrar stjórnarskrár. Þingið á og verður að taka afstöðu til þess. Í staðinn fyrir það er verið að fara miklar krókaleiðir í þessu sambandi. Það er nú aðalmálið. Verið er að efna til þjóðaratkvæðagreiðslu á kolvitlausum tímapunkti í ferlinu.
En varðandi spurningarnar sjálfar velti ég því fyrir mér hvort hv. þingmaður, sem á sæti í stjórnskipunar- og eftirlitsnefnd, geti upplýst hver viðbrögð meiri hlutans voru við hugmyndum (Forseti hringir.) að öðrum spurningum en komu frá þeim sjálfum.
