ráðgefandi þjóðaratkvæðagreiðsla um tillögur stjórnlagaráðs að frumvarpi til stjórnarskipunarlaga.

Virðulegi forseti. Spurningar þær sem hv. þingmaður vísar til ættu auðvitað ekki að vera uppi. Það ætti ekkert að þurfa að spyrja að því hvort nauðsynlegt sé að ákvæði í stjórnarskrá séu skýr og skiljanleg. Það ætti ekkert að þurfa að spyrja að því hvort ákvæði í stjórnarskrá séu framkvæmanleg. En því miður, þegar drögin frá stjórnlagaráði hafa verið lesin, er ástæða til að spyrja slíkra spurninga.

Það varpar ljósi á þann galla sem er á málinu öllu, að það er vanbúið. Ekki er við fólkið sem tók þátt í starfi stjórnlagaráðs að sakast, því var ætlaður mjög skammur tími til þess verkefnis að skrifa heila stjórnarskrá sem svo augljóslega, ef vinna átti það á þann veg sem lagt var upp með, hefði tekið miklu lengri tíma. Fyrir vikið erum við í þeirri stöðu að leggja á til þessi drög og taka afstöðu með þeim eða á móti á sama tíma og fyrir liggur sá vilji í þinginu að í gang fari vinna við að sníða lagatæknilega agnúa af þeim, eins og það er kallað.

Virðulegur forseti. Lagatæknilegir agnúar í tillögum að breytingum á stjórnskipan landsins — átta hv. þingmenn sig ekki á því hversu illa það hljómar og hvernig sagan mun dæma þá sem fara fram með þessum hætti í jafnmikilvægu máli og stjórnarskrá hvers lands er?