ráðgefandi þjóðaratkvæðagreiðsla um tillögur stjórnlagaráðs að frumvarpi til stjórnarskipunarlaga.
Virðulegi forseti. Ég hugsa að ég deili því með ansi mörgum landsmönnum að ég vildi að þingkosningar hefðu nú þegar farið fram. Ég ber enn þá þá von í brjósti að ríkisstjórnin springi fyrir þann tíma sem boðaður er fyrir næstu kosningar, þ.e. í apríl á næsta ári. Auðvitað verður spurningin um aðildarumsóknina að ESB tekin upp í næstu þingkosningum ef svo ber undir. En á meðan ekki er fyrirséð að ríkisstjórnin springi og hún geti haldið sér á valdastólum alveg fram á vor 2013 er alveg orðið tímabært að þjóðin fái að segja álit sitt á ESB í þjóðaratkvæðagreiðslu. Ég segi það sérstaklega í ljósi þess sem kom fram í umræðum í dag í fyrirspurnatíma þegar hæstv. efnahags- og viðskiptaráðherra tjáði þingi og þjóð að nú þegar hefði farið fram neyðarfundur í ríkisstjórninni vegna ástandsins í Grikklandi og á evrusvæðinu. Ríkisstjórn Íslands heldur neyðarfundi, ríkisstjórnarfundi og efnahagsráðherrafundi, eða hvað það ágæta ráð heitir nú, til að undirbúa sig fyrir það hvað gera eigi hér á landi ef evran hrynur, ef Grikkland gengur út úr evrusamstarfinu, sem dæmi.
Með annarri hendinni er verið að halda neyðarfundi vegna ástandsins núna í Suður-Evrópu sem allir sjá en á meðan er hin höndin að sækja um aðild að þessu hrunda sambandi. Ég segi ekki annað en þetta, frú forseti: Það er eitthvað mikið að hjá þessari ríkisstjórn. Hvaða fullvalda ríki lætur sér detta í hug að vera með umsókn inni að Evrópusambandinu á meðan óvissan er eins mikil og hún er? Og neyðarfundir ríkisstjórnarinnar — ég hafði ekki áttað mig á því (Forseti hringir.) hvað ríkisstjórnin lítur málið alvarlegum augum. Ég átta mig enn síður á því hvers vegna umsóknin er þá ekki dregin til baka.