störf þingsins.

Hæstv. forseti. Undanfarna daga hefur mikið verið ritað og rætt um tillögur sem liggja fyrir þinginu um að halda þjóðaratkvæðagreiðslu um áframhald aðildarviðræðna við Evrópusambandið. Samninganefnd Íslands gagnvart ESB gegnir lykilhlutverki í því að ná góðum samningi. Þessar viðræður eru langt í frá þær fyrstu sem við eigum við Evrópusambandið og fordæmin lofa góðu. Íslendingar náðu fram nær öllum kröfum sínum þegar við sömdum um fríverslunarsamning við Evrópusambandið árið 1972. Við náðum fram nær öllum kröfum okkar þegar við sömdum við Evrópusambandið um Evrópska efnahagssvæðið 1994 og nú síðast í Schengen.

Það er í rauninni stórmerkilegt hve vel tókst til. Það gekk hins vegar ekki átakalaust. Samningaviðræður fela í sér lausn deilumála. Mörgum spurningum þarf að svara áður en þjóðaratkvæðagreiðsla um Evrópumál getur farið fram. (VigH: Rangt.)

Í fyrsta lagi þurfum við að vita hvernig samningi við getum náð í sjávarútvegsmálum. Það liggur ekki fyrir. (Gripið fram í.)

Í öðru lagi þurfum við að vita hvort Seðlabanki Evrópu sé tilbúinn að styðja við krónuna og aðstoða við afnám gjaldeyrishafta. Það liggur ekki fyrir þó að ágætisfréttir hafi borist okkur til eyrna úr Hádegismóum í morgun. (TÞH: Við getum eitthvað …)

Í þriðja lagi þurfum við að vita hvernig samningum við náum um aukna atvinnuuppbyggingu og bættar samgöngur (Gripið fram í: ESB …) innan uppbyggingarstefnu ESB. (Gripið fram í.) Það hversu hagstæður sá hluti samningsins verður liggur ekki fyrir. (Gripið fram í.)

Í fjórða lagi þurfum við að sjá svart á hvítu hvort samninganefndin geti tryggt íslenskum bændum jafnhagstæðan landbúnaðarsamning og samninganefndir Svía og Finna tryggðu sínum bændum. (Gripið fram í.) Svo mætti lengi áfram telja. Við verðum að sjá hvað í aðildarsamningi felst. Fyrr verður ekki hægt að leggja mat á það hversu vel samninganefnd okkar hefur tekist til.