formleg innleiðing fjármálareglu.
Virðulegi forseti. Það er hárrétt, en þeir sem telja að þjóðaratkvæðagreiðslan, sem fram fer 20. október, snúist um að þjóðin geti hafnað eða samþykkt drög að nýrri stjórnarskrá, vaða í villu og svíma vegna þess að það væri brot á ákvæðum núverandi stjórnarskrár að þingið hefði ekkert um hana að segja. Einungis þingið getur breytt stjórnarskránni samkvæmt núverandi stjórnarskrá.
Það er bagalegt að eini prófessorinn í hagfræði sem hefur innsýn til að berjast fyrir slíkri reglu — hann barðist að vísu fyrir fjármálareglu en sú fjármálaregla gekk út á að banna lausagöngu búfjár — skyldi ekki berjast fyrir þessari mjög svo nauðsynlegu breytingu, þ.e. að reyna að hemja stjórnmálamennina í því að eyða um efni fram og setja þjóðina í þá stöðu sem hún er í í dag. Við borgum 90 milljarða í vexti á ári, það væri hægt að gera mikið fyrir þá peninga.
En ég held, burt séð frá því hvaða álit maður hefur á þeim drögum að stjórnarskrá sem nú liggja fyrir, að þeir vaði í mikilli villu og svíma sem halda að þessi skoðanakönnun bindi hendur Alþingis á einhvern hátt. Það er af og frá og væri hægur vandi að bæta við ákvæðum ef menn vildu gjörbylta stjórnarskránni.