141. löggjafarþing — 48. fundur,  6. des. 2012.

vörugjöld og tollalög.

473. mál
[22:18]
Horfa

Helgi Hjörvar (Sf) (andsvar):

Virðulegur forseti. Fyrst um hið síðastnefnda. Ef þingflokkur Sjálfstæðisflokksins flytur mál í samræmi við ályktanir á landsfundi flokksins um að afnema skuli vísitölubindingu lána til einstaklinga, skal ég sannarlega verða stuðningsmaður þess. Ég er sammála hv. þingmanni um að það er óheppilegt fyrirkomulag að hækkanir á sköttum leiði til hækkana á lánum.

Hitt er síðan fjarri öllu lagi, að hér sé um einhverja ofurgjaldtöku eða gríðarlega forræðishyggju að ræða. Staðreyndin er sú að matvara, sem við erum að fjalla um, sætir sérstökum skattaívilnunum. Þannig er til dæmis ekki krafist 25,5% virðisaukaskatts á sykruðum gosdrykkjum, eins og á allri annarri vöru í landinu, heldur aðeins 7% virðisaukaskatts. Sykruð matvara nýtur þannig alveg sérstakra fríðinda í virðisaukaskattskerfinu. Þau gjöld vega ekki einu sinni upp á móti þeim ívilnunum þannig að auðvitað má nálgast verkefnið öðruvísi. Það mætti út af fyrir sig nálgast það með því að láta sykruðu vörurnar, sykraða gosdrykki og annað slíkt, bera 25,5% virðisaukaskatt. Það er engin sérstök forræðishyggja fólgin í því, engin sérstök neyslustýring. Það er bara afstaða um að sykraðir gosdrykkir eigi að bera hina almennu virðisaukaskattsprósentu sem er í gildi í landinu. Það er út af fyrir sig önnur aðferð við að nálgast sama viðfangsefnið og felur hvorki í sér ofurskattlagningu né einhverja sérstaka forræðishyggju.