vernd og orkunýting landsvæða.
Virðulegi forseti. Já, ég get sagt það sama um sjálfa mig varðandi þau svik sem urðu hjá ríkisstjórninni eftir að lögin voru samþykkt. Það datt ekki nokkrum einasta manni í hug að farið yrði með málið í þennan farveg. Eftir að lögin voru samþykkt í maí 2011 var gefinn tólf vikna umsagnartími um rammaáætlunina sjálfa — og hún kemur gjörbreytt til baka. Ég verð að viðurkenna að mér datt ekki í hug að ríkisstjórnin mundi fara með málið í þann farveg. Samvinna og samheldni hafði verið um áætlunina, nokkurs konar þjóðarsátt sem birtist í þessu plaggi þegar verkefnisstjórnin skilaði af sér. Á milli aðila í samfélaginu var kominn friður og sátt. Nei, þá gekk hæstv. forsætisráðherra, Jóhanna Sigurðardóttir, fram ásamt hæstv. ráðherra Steingrími J. Sigfússyni og setti málið í uppnám. Þetta er alveg hreint með ólíkindum.
Af því að hv. þingmaður rifjaði það upp að ríkisstjórnin vinnur á þann hátt að þeir sem eru ekki sammála henni eru settir út í kuldann þá ber að geta þess að hæstv. innanríkisráðherra var settur út úr ríkisstjórninni á sínum tíma en hann fékk nú að koma inn í hlýjuna aftur gegn hlýðni, líklega í ESB-málinu. Mjög tíð ráðherraskipti hafa orðið á starfsferli núverandi ríkisstjórnar, margir kallaðir til og margir verið látnir fara. Ríkisstjórnin er því komin í einkennilega stöðu. Fræðimenn í háskólanum eru gagnrýndir og teknir niður ef þeir dirfast að gagnrýna stjórnarskrárfrumvarpið. Nú er ríkisstjórnin komin í hár saman við verkalýðshreyfinguna eins og ég fór yfir í fyrra andsvari. Ég er eiginlega farin að hlakka til þegar ríkisstjórnin tekur kast á Feneyjanefndinni, því að nú er komið í ljós að Feneyjanefndin ætlar sér að minnsta kosti þrjá mánuði til að lesa yfir drögin að stjórnarskránni. (Forseti hringir.) Ætli hún sé ekki næst á aftökulistanum hjá ríkisstjórninni? Það mætti segja mér það.