málefni heimilanna.
Frú forseti. Nú veit ég ekki hvaða setningu hv. þingmaður vitnar þarna í. (Gripið fram í.) Varðandi námslánin, eigum við þá ekki að ræða hvernig námslánin eru og námslánafyrirkomulagið á Íslandi? Þau eru með stórlega niðurgreiddum vöxtum upp á 1% og ríkið borgar tæpan helming af árlegum kostnaði lánasjóðsins beint í framlög í þetta kerfi svo ekki sé komið óorði á það líka eins og alla skapaða hluti. Ég tel að lögin um Lánasjóð íslenskra námsmanna séu ein framsæknasta félagsmálalöggjöf sem hefur verið sett í landinu. Hún á stóran þátt í því að tryggja hér jafnrétti til náms og hefur verið betrumbætt og reyndar stendur til að gera enn betur í þeim efnum. Framfærslugrunnur námslána hefur verið hækkaður umfram verðlag á tímabili þessarar ríkisstjórnar þannig að ég tel að við þurfum ekki að bera kinnroða yfir einu eða neinu af því sem snúið hefur að námsmönnum að þessu leyti á undanförnum árum.
Ég er auðvitað áhugasamur um að skoða allar góðar hugmyndir hvaðan sem þær koma fram og þess vegna hlýddi ég með miklum áhuga á formann Framsóknarflokksins í morgunútvarpinu útlista það hver hefði orðið afurð og niðurstaða þingflokks framsóknarmanna í þessum efnum. Ég verð að viðurkenna að ég átta mig ekki alveg (Forseti hringir.) á hver niðurstaðan varð því að þegar að var spurt voru engar tölur nefndar eða beinar útfærslur lagðar á borðið. Er það þá hugsanlega þannig að Framsóknarflokkurinn sé í svipaðri stöðu og fleiri í þessum efnum að átta sig á að það er hægara sagt en gert að taka á þessum flóknu og erfiðu málum?