stjórn fiskveiða.
Frú forseti. Það eru 15 dagar eftir í störfum Alþingis. Hér kemur loksins fram frumvarp til laga um stjórn fiskveiða. Ég vil spyrja hæstv. ráðherra: Gerir hann sér yfirleitt vonir um að það verði samþykkt? Hvort mundi hann velja þetta frumvarp eða frumvarpið um stjórnarskrána ef velja þyrfti á milli? Það verður erfitt að gera hvort tveggja.
Síðan vildi ég spyrja hann um það sem kemur fram í greinargerð frá fjármálaráðuneytinu. Þar stendur, með leyfi frú forseta:
„Fjármála- og efnahagsráðuneytið bendir í þessu sambandi á að mörkun ríkistekna í tiltekin verkefni eða til tiltekinna aðila, í þessu tilviki til sjóðs á vegum ráðherra, bindur hendur fjárveitingavaldsins og skerðir fjárstjórnarvald Alþingis sem kveðið er á um í stjórnarskránni.“
Það er sem sagt meiningin að fara að brjóta stjórnarskrána. Við erum að vanda okkur við það núna að gera breytingar á stjórnarskránni. Stendur ekki til að virða stjórnarskrána yfirleitt?