stjórnarskipunarlög.

Virðulegi forseti. Hv. þingmaður dregur fram athyglisverða spurningu varðandi upplýsingaréttinn. Það er hárrétt að nýlega voru samþykkt lög um upplýsingarétt hér í þinginu. Í því ákvæði í tillögu að stjórnarskrá, með þeirri breytingartillögu sem ég kynnti hér áðan og meiri hluti stjórnskipunar- og eftirlitsnefndar gerir að sinni, er lagt til að stigið sé stærra skref, róttækara skref, í því að opna og styrkja upplýsingarétt almennings hvað varðar þau gögn sem stjórnsýslan býr yfir, en við höfum vanist.

Ég tel ekki að við eigum að stíga skrefið til baka og draga úr þessum upplýsingarétti. Ég held einmitt að við eigum að hafa metnað til þess að hafa stjórnsýsluna opnari og gagnsærri en að við eigum að bregðast við þessu ástandi með því að hafa gildistímann rýmri á þessu ákvæði en á stjórnarskránni í heild sinni. Ég tel að það séu rökrétt viðbrögð. Við ættum að draga þann lærdóm af því sem hér hefur gerst á undanförnum árum að við verðum að sýna meiri metnað og hafa skilning á því að bæði almenningur og ekki síður fjölmiðlar þurfa á því að halda að fá nákvæmari og betri aðgang að upplýsingum úr stjórnkerfinu en tíðkast hefur.