almennar stjórnmálaumræður.
Forseti. Ég vil byrja á að þakka þeim sem eru að fylgjast með þessum umræðum fyrir að gefa sér tíma til að hlusta á fulltrúa sem margir hverjir munu stýra landinu eftir næstu kosningar. Ég vil hvetja fólk til að muna að ef eitthvað hljómar of gott til að vera satt þá er það væntanlega ósatt eða óframkvæmanlegt. Ég hef orðið þess heiðurs aðnjótandi að vera í samfélagsvinnu í heilt kjörtímabil og satt best að segja hefði mig aldrei órað fyrir því að ég mundi hafa hugrekki til að fara í atvinnuviðtal við heila þjóð og hvað þá fá umboð til að vera hér í þingsal. Fyrir það er ég óendanlega þakklát. Þetta umboð hefur oft og tíðum fyllt mig auðmýkt og verið pínulítið yfirþyrmandi því að mikil er ábyrgð okkar hérna innan veggja að tryggja að lögin séu gerð með heildarhagsmuni þjóðar að leiðarljósi. Mörg eru villuljósin á vegslóða þingmannsins, margir ganga með ráðherra í maga sér og dreymir um völd og halda að það sé leiðin að breytingum fyrir umbjóðendur sína.
Ég fyrir mína parta hef aldrei skilið þetta ráðherrablæti. Hvað er svona merkilegt við það að klippa borða og hafa einkabílstjóra? Til að stuðla að betra samfélagi þurfum við að þróa kerfi sem virkar fyrir alla. Til þess að tryggja að kerfið verði þannig en ekki útblásin maskína sem vinnur oft og tíðum gegn þeim sem ekki passa inn í það þurfum við meira gagnsæi og vitneskju um það hvernig þetta gengur fyrir sig, hver skrifar hvað og af hverju. Flestir eru búnir að fá nóg af átökum og ég vona að nýtt kjörtímabil muni ekki litast af sambærilegum átökum og við höfum upplifað á þeim fjórum árum sem ég hef unnið innan veggja þingsins.
Mér finnst vert að geta þess að þingið hefur þrátt fyrir átakastílinn og vanvirðingarstimpilinn breyst mjög mikið miðað við þær hefðir sem hér áður fyrr ríktu. Virðing þingsins mun endurheimtast um leið og afrakstur starfa okkar verður betri og af meiri gæðum. Þingið hefur endurheimt eitthvað af þeim völdum sem því ber að hafa. Hér hafa oft og tíðum ratað inn mjög slæm lög úr ráðuneytunum sem þingið hefur umbreytt í lög sem endurspegla betur þær nútímakröfur sem gerðar eru um lagasetningu og þá heildrænu sýn sem þinginu ber að móta í sameiningu með heildarhagsmuni í huga.
Ég kom hér inn fyrir framboð sem spratt upp úr mörgum grasrótarhópum í kjölfar hrunsins með einfalda stefnuskrá og valdastrúktúr sem hefur einkennst af flötum strúktúr þar sem við höfum öll setið við sama borð, laus við foringjaræði og flokksaga. Við höfum getað fylgt hjarta okkar og samvisku og jafnframt komið á nýjum hefðum. Þar ber helst að nefna þverpólitíska samvinnu sem við komum á í tengslum við Icesave. Við höfum unnið af heilindum með öllum flokkum út frá málefnum og aldrei ástundað hrossakaup þó svo að andstæðingar okkar hafi haldið slíku fram. Stuðningur okkar við málefni hefur alltaf verið á málefnalegum grunni án þess að fá neitt fyrir hann nema framgang málefnisins. Ég vona að slík vinnubrögð muni halda áfram að einkenna Alþingi í framtíðinni. Ég er persónulega stoltust af vinnu minni í tengslum við þingsályktun sem hefur fengið gælunafnið IMMI en í henni fól ég, ásamt þingmönnum úr öllum kjörnum flokkum, ríkisstjórninni að skrifa bestu mögulegu löggjöf á sviði upplýsinga, tjáningarfrelsis og gagnsæis í anda 21. aldarinnar.
Ályktunin spannaði löggjöf í fjórum ráðuneytum og hefur verið skipaður sérstakur starfshópur af menntamálaráðuneytinu til að vinna að því að greina og skrifa frumvarp sem ríkisstjórninni er falið að koma í lög hingað inn á Alþingi. Vegna þess að þingið samþykkti einróma ályktun þess efnis að við hefðum bestu mögulegu upplýsingalöggjöf sem völ er á tókst þinginu að umbreyta þeim upplýsingalögum sem við fengum frá ráðuneytinu í löggjöf sem er með sanni gagnsæislöggjöf í takt við nútímann. Heimildarverndarlögin eru jafnframt byggð á IMMI og það er vert fyrir næsta þing að þingið samþykkti einróma að hér ríkti sú stefna að vera ávallt með bestu mögulegu löggjöf á þessu sviði.
Í sögulegu samhengi er það einstætt að þingmanni frá minnsta stjórnarandstöðuflokknum hafi tekist að ná fram einhug um það innan þings að leggja fram saman ályktun sem er stefnumótandi fyrir land og þjóð. Samþykkt ályktunarinnar gaf síðan tóninn fyrir fleiri sambærileg verkefni á þinginu og ber þar helst að nefna ályktun um græna hagkerfið sem er mjög í anda IMMI og helst vel í hendur við þá framtíðarsýn sem við erum að móta okkur sem land. Land sem er netvænt og samkeppnishæft í takt við þær væntingar sem við gerum okkur til framtíðarinnar.
Á þessu kjörtímabili skapaði til dæmis internetið 20% af hagvexti þróaðra hagkerfa. Á næsta kjörtímabili mun hagkerfi internetsins nær tvöfaldast. Viljum við vera með í þeim hagvexti og nýta okkur þann mikla mannauð og hugvit sem við búum yfir og er því miður að hverfa frá okkur í samfélög þar sem þessi gildi og auður er metinn að verðleikum? Netvænt umhverfi á Íslandi þýðir að vöxtur internetsins verður að verðmætasköpun fyrir samfélagið allt. Netvænt Ísland þýðir aukna fjárfestingu, sterkari fyrirtæki og fleiri störf á öllum sviðum atvinnulífsins.
Til þess að Ísland geti orðið netvænt land sem ýtir undir verðmætasköpun og verndar réttindi internetnotenda þurfum við að tryggja eftirfarandi: netvænt lagaumhverfi, viðskiptaumhverfi, þekkingarumhverfi og fjárfestingarumhverfi. Til þess að þetta sé hægt verðum við að hafa fólk með sambærilega þekkingu og hugsjón og fyrirfinnst aðeins enn sem komið er meðal Pírata í heimahéraðinu Íslandi sem og meðal allra þeirra sem eru hluti af sprotastjórnmálaafli heimsins. Við verðum að hafa Pírata á þingi því að annars munum við hafa lagasetningu sem er ekki bara hættuleg en jafnframt gagnslaus samanber lög innanríkisráðherra um happdrættisstofu en þar á til dæmis að skikka greiðslufyrirtæki til að hafa eftirlit með netnotkun þeirra sem nota þjónustu þeirra. Fyrirtæki vilja það ekki en samt á að skikka þau til þess. Það er ekki framþróun heldur afturför.
Við Píratar ætlum að færa lagaumhverfið inn í 21. öldina svo að það endurspegli nýjan raunveruleika sem internetið hefur skapað. Enn þá hefur ekkert land markað sér almennilega sérstöðu á þessu sviði sem hefur náð að haldast í hendur við þá öru framþróun sem á sér stað. Friðhelgi einkaleyfisins á internetinu er til dæmis ekki til. Án Pírata á þingi er öruggt að fleiri slík lög leggja hömlur á netvæna Ísland og hægja á framgangi og von um að geta unnið óháð búsetu í heimahögum og heima hjá sér í auknum mæli. Í framtíðinni ættum við að geta haft bein áhrif á það hvernig þingmenn okkar vinna og verja atkvæðum sínum. Píratar vinna að þróun slíkra lausna í flokksstarfinu sem ætlunin er að þróa og gefa öðrum flokkum og þinginu aðgengi að án endurgjalds.
Við ættum síðan að drífa okkur í því að aftengja hefðbundna bankastarfsemi frá áhættubankastarfsemi. Við verðum að tryggja lög sem tryggja neytendavernd þeirra sem kaupa húsnæði en það er stærsta fjárfesting langflestra í lífi þeirra og stórfurðulegt hve mikil áhætta fylgir því. Ég kalla eftir þjóðarsátt til að koma skikki á lánamál heimilanna og til að afnema einræði verðtryggingar og áhættu óverðtryggðra lána. Píratar gera sér grein fyrir því að enginn einn hópur getur fundið lausnir fyrir alla. Samstillt átak í þessa veru og almennt þjóðarátak í þessa veru, byggt á nýjum stjórnarsáttmála sem ný stjórnarskrá inniber, er upphafið að nýja Íslandi. Látum það ekki renna úr greipum okkar, verum með, skiptum okkur af og umfram allt ekki gleyma að til þess að búa í því samfélagi sem okkur dreymir um ætti vinna við að gera það að veruleika að vera hluti af okkar daglega vafri um netheima. Búum til slíkt aðhald fyrir ráðamenn og notum það. Það er skemmtilegt og það er mikilvægt. — Góðar stundir.
