velferð dýra.
Virðulegi forseti. Ég er hjartanlega sammála hv. þingmanni um að þegar sett er löggjöf um dýravelferð þá er það velferð dýra sem er undirliggjandi. 1. gr. frumvarpsins, sem er markmiðsgreinin, á að vera sú grein sem allar aðrar greinar eru túlkaðar út frá. Þess vegna hef ég svolitlar áhyggjur af því að ef við tökum upp það fordæmi þegar kveðið er á um það í lögum að sett skuli reglugerð með vísan til samræmis við sérstakar greinar, að það kunni að opna á eitthvert sjúsk í túlkun laga. Af því að það er auðvitað og á að vera ófrávíkjanleg krafa að reglugerðir eigi sér alltaf stoð í lögum og séu fullkomin hlýðni og virðing við lagabókstafinn.
Það er það eina sem truflar mig í rauninni við þessar breytingartillögur þingmannsins, sem ég veit þó að eru settar fram af góðum hug og að gefnum tilefnum því að stundum finnst manni reglugerðarákvæðin ekki alveg í anda laga, svo ekki sé fastar að orði kveðið. Það er þetta sem ég hef áhyggjur af.