störf þingsins.
Herra forseti. Ég vil nota tækifærið hér undir liðnum um störf þingsins, sem ég að jafnaði hef notað sparlega, til að vekja athygli forseta Alþingis á því að forsætisráðuneytið hefur nú með bréfi alfarið hafnað bréfi þingflokks Vinstri grænna um upplýsingar um störf svonefnds hagræðingarhóps.
Í bréfi þingflokksins var sérstaklega vísað til þeirrar vinnu sem stendur yfir á Alþingi við fjárlagafrumvarp og tekjuöflunarfrumvörp ríkisstjórnarinnar. Það hlýtur að styrkja beiðni þingflokks og þingmanna um aðgang að gögnum sem varða beint þau mál sem komin eru á forræði Alþingis og eru hér til umfjöllunar. Engu að síður kýs forsætisráðuneytið að rangtúlka í fyrsta lagi beiðnina á þann veg að spurt sé um vinnugögn þegar skýrt er tekið fram í bréfinu að ekki er verið að biðja um ófrágengin vinnugögn heldur önnur gögn. Forsætisráðuneytið túlkar það þannig að þar sem nefndin tengist starfi ráðherranefndar um ríkisfjármál sé hún algerlega handan upplýsingalaga og væntanlega handan þess að framkvæmdarvaldið þurfi að standa Alþingi skil á nokkrum upplýsingum um þessa vinnu.
Engu að síður er hér um stjórnskipaða nefnd að ræða með formlegu erindisbréfi og það hlýtur að vera okkur nokkurt umhugsunarefni að framkvæmdarvaldið geti með slíkum aðferðum algerlega komið sér hjá því að veita Alþingi upplýsingar um vinnu — sem snýst um hvað? Ekki einhver stefnumörkunarmál inn í framtíðina eða einhverja smámuni heldur allan ríkisreksturinn því í erindisbréfi hópsins eru lagðar kvaðir á ráðuneyti og stofnanir að vinna í þágu þessa hóps, hann fær því sterka stöðu sem slíkur, sem stjórnskipaður hópur með erindisbréfi, en honum er samt skotið undan upplýsingalögum.
Þetta tel ég, virðulegur forseti, vera mikið áhyggjuefni fyrir okkur hér á Alþingi. Ég hvet því forseta Alþingis til þess að láta lögfræðinga Alþingis athuga þetta mál. Við munum að sjálfsögðu reiða fram bréfaskriftirnar og öll gögn og ég hvet forseta Alþingis einnig til þess að ræða þetta við stjórnskipunar- og eftirlitsnefnd. Ég tel að Alþingi þurfi verulega að velta stöðu sinni fyrir sér er framkvæmdarvaldið getur með svona brellum algerlega gert að engu sterkan rétt þingmanna til upplýsingagjafar og upplýsingalög.