fjáraukalög 2013.

Virðulegi forseti. Ég þakka hv. þingmanni skýringarnar. Ef við gefum okkur það að skýringar ráðuneytisins haldi, um að 240 milljónir af þessum átakspeningum séu ekki að renna út, vaknar spurningin: Hvernig er þeim best varið út frá markmiðinu um að auka námsframboð fyrir ungt fólk sem á erfitt með að fóta sig á vinnumarkaði?

Þá kemur aftur að því að þessi ríkisstjórn heggur alls staðar á sama tíma. Í fjárlagatillögum að öðru leyti er gert ráð fyrir að leggja af öll vinnumarkaðsverkefni fyrir ungt fólk, öll, það er verið að slátra þeim öllum. Peningar úr Atvinnuleysistryggingasjóði inn í þessi verkefni fara ekki inn í þau. Nýi starfsmenntasjóðurinn sem hv. þingmaður nefndi, upp á 300 milljónir, er sleginn af í fjárlögum fyrir næsta ár.

Skilaboð þessarar ríkisstjórnar til þess unga fólks sem er enn að reyna að fóta sig á vinnumarkaði eftir að hafa verið fórnarlamb brottfalls, eftir að hafa farið út á vinnumarkaðinn á góðærisárunum fyrir hrun og hefur ekki komist aftur í vinnu og á ekki að fá að komast inn í skólana, er að það eigi til langframa að vera læst úti.

Mér finnst gríðarlega dapurlegt að ekki skuli vera nokkur félagslegur skilningur hjá ríkisstjórnarmeirihlutanum á þessum alvarlega vanda, á þeirri stöðu að framhaldsmenntun er miklu minni hér en í öllum nágrannalöndunum og að við erum búin að glíma við það af veikum mætti í mikilli kreppu og að sjá menn láta sér detta í hug að klippa á alla þá vaxtarbrodda akkúrat núna finnst mér algerlega óskiljanlegt.