aukatekjur ríkissjóðs.

Virðulegi forseti. Ég mæli fyrir nefndaráliti um frumvarp til laga um breyting á lögum nr. 88/1991, um aukatekjur ríkissjóðs, með síðari breytingum. Þetta frumvarp kom fyrir efnahags- og viðskiptanefnd. Nefndin fékk á sinn fund fulltrúa fjármála- og efnahagsráðuneytisins, svo og umsögn frá Sálfræðingafélagi Íslands.

Með frumvarpinu er lagt til að 10. og 11. gr. laga um aukatekjur ríkissjóðs, nr. 88/1991, verði breytt í nokkrum atriðum vegna breytinga á starfsheitum heilbrigðisstarfsmanna til að bæta úr lagatilvísunum og í ljósi breytinga á lagagrundvelli fjölmiðla.

Sú athugasemd var gerð við 1. gr. frumvarpsins að þar væri óljóst hvað réði skiptingu starfsheita á milli einstakra stafliða. Var bent á að allar fagstéttir sem taldar eru upp í 10. gr. laganna, að teknu tilliti til 1. gr. frumvarpsins, væru löggiltar heilbrigðisstéttir. Kom sú skoðun fram að eðlilegra væri annaðhvort að tilgreina allar fagstéttir undir einum tölulið eða aðskilja þær fullkomlega þannig að hver stétt væri tilgreind undir sérstökum tölulið. Að mati nefndarinnar ber að líta til þess að þær heilbrigðisstéttir sem hafa fengið löggildingu eru ítarlega taldar upp í 10. gr. laga nr. 34/2012, um heilbrigðisstarfsmenn. Þá er ráðherra heimilað með útgáfu reglugerðar að fella þær starfsstéttir undir lögin sem ekki eru þar taldar upp.

Í lögunum er fjallað sérstaklega um réttindi og skyldur starfsmanna, m.a. um skilyrði fyrir veitingu starfsleyfis. Í lögum um aukatekjur ríkissjóðs, nr. 88/1991, er hins vegar einungis að finna heimildir hins opinbera til töku ýmissa gjalda, t.d. heimildir til töku gjalda vegna veitingar atvinnuréttinda og leyfa fyrir atvinnustarfsemi. Í þeim koma hvergi fram efnisreglur af neinu öðru tagi.

Lög um aukatekjur ríkissjóðs tóku gildi 1. janúar 1992 en þeim hefur verið breytt margsinnis síðan. Athugasemdir sem getið er hér að framan varðar uppsetningu þeirra. Að mati nefndarinnar er hægt að taka undir að samhengi einstakra greina sé að nokkru leyti órökrænt. Svo virðist þó hafa verið í gegnum tíðina allt frá gildistöku laganna, en líta verður til þess hver tilgangur laganna er og hvaða kröfur verður að gera til þeirra í því ljósi.

Nefndin leggur til að frumvarpið verði samþykkt óbreytt. Undir nefndarálitið rita hv. þingmenn Frosti Sigurjónsson, Pétur H. Blöndal, Árni Páll Árnason, Líneik Anna Sævarsdóttir, Steingrímur J. Sigfússon og Vilhjálmur Bjarnason. Aðrir nefndarmenn, hv. þingmenn Guðmundur Steingrímsson, Ragnheiður Ríkharðsdóttir og Willum Þór Þórsson, voru fjarverandi afgreiðslu málsins.

Virðulegi forseti. Ég hef lokið máli mínu.