ýmsar forsendur fjárlagafrumvarps 2014.

Virðulegur forseti. Ég þakka hv. þingmanni fyrir framsöguræðu hans hér um forsendur fjárlaga, en það eru kannski helst tíðindi morgunsins sem gera að verkum að ég kem í andsvar við hv. þingmann því að í morgun var upplýst að Century Aluminum hefði ekki áform um að reisa álver í Helguvík að óbreyttu. Eftir því sem ég best veit var gert ráð fyrir því í forsendum þessa fjárlagafrumvarps að af framkvæmdinni yrði. Þar eð fjárlögin eru auðvitað um það sem er í undirbúningi eða á að gerast á næsta ári og nú liggur fyrir að þessi áform eru ekki fyrirhuguð, er þá ekki nauðsynlegt fyrir hv. efnahags- og viðskiptanefnd og kannski fyrst og fremst fjárlaganefnd að kalla frumvarpið aftur inn í nefnd og fara yfir það hvaða áhrif þetta hefur á tekjuhlið frumvarpsins, þær forsendur sem þar voru um fjárfestingu, einkaneyslu og tekjur ríkissjóðs almennt, og hvort markmiðið um hallalaus fjárlög standist enn?

Auðvitað þýða þessar fréttir í morgun ekki að útilokað sé að af þessu verkefni geti orðið. Kannski breytast áform fyrirtækisins og teknar verða nýjar ákvarðanir um að ráðast í þetta verkefni, en ég hefði haldið að það væri augljóst að þegar fyrir liggur yfirlýsing af hálfu fyrirtækisins um að það fyrirhugi ekki þessa framkvæmd og líti á undirbúning sem sokkinn kostnað að óbreyttu sé nauðsynlegt að taka framkvæmdina út úr forsendum fjárlaga og leiðrétta tekjuhlið frumvarpsins í samræmi við það. Ég spyr hv. þingmann hvort hann sé ekki sammála því.