styrkir til húsafriðunar.
Virðulegi forseti. Þær úthlutanir sem hv. þingmaður vísar til voru í samræmi við verklagið sem gilti um það fjármagn sem var til ráðstöfunar og hafði að mestu leyti orðið til á síðasta kjörtímabili og miðar ekki eingöngu að því að styrkja húsafriðunar- eða húsaverndarmál heldur fyrst og fremst atvinnusköpun með áherslu á umhverfisvænar framkvæmdir og verndun húsa. Þetta er því í samræmi við það sem þar er lagt upp með þó að ég telji reyndar að það mætti vel bæta fjármagni í húsavernd almennt. Það var skorið töluvert niður, ég held um 82% á milli ára í framlögum til húsafriðunarnefndar sem var liður í þeim óhjákvæmilegu sparnaðaraðgerðum sem ráðist var í við gerð fjárlaga til að skila þeim hallalausum.
Hvað varðar þær úthlutanir sem hv. þingmaður spyr um þá var lagt mat á þær af þar til bærum sérfræðingum og Minjastofnun annast eftirfylgni með öllum þessum styrkjum.