lagaskrifstofa Alþingis.
Hæstv. forseti. Ég þakka hv. þm. Vigdísi Hauksdóttur, flutningsmanni frumvarpsins, kærlega fyrir að leggja það fram og fara mjög vel yfir það.
Ég ítreka að ég mundi gjarnan vilja vera meðflutningsmaður á þessu máli, ég er mjög hlynntur því. Enda hver væri það ekki? Hver er ekki hlynntur öllu því sem snýr að vönduðum vinnubrögðum? Þetta er í anda ýmissa mála sem verið hafa í deiglunni, meðal annars er hér þingsályktunartillaga frá hv. þm. Pétri H. Blöndal sem snýr að úrvinnslu lagafrumvarpa og svo höfum við verið með það til umræðu að létta reglubyrði í atvinnulífi og fleira sem tengist þessu.
Ég vil fá að spyrja um núverandi fyrirkomulag. Í hverju felst sannarlega munurinn ef slíkri lagaskrifstofu yrði komið á? Í öðru lagi spyr ég, og það er á svipuðum nótum og hv. þm. Össur Skarphéðinsson kom inn á, um þessa tvo prófessora í lögum. Í þriðja lagi er það lagaráð sem löngum hefur verið, eða lagaskrifstofa. Eins og hv. þm. Vigdís Hauksdóttir kom inn á hefur þetta verið lagt fram áður, hún hefur lagt það fram hér undanfarin löggjafarþing. Og ég spyr: Af hverju hefur þetta ekki fengið framgang?